உன்னிடத்தில் என்னை கொடுத்தேன் by Veena Shankar

 

உன்னிடத்தில் என்னை கொடுத்தேன்

தொட்டவுடன் பற்றி கொள்கிறாய் - நெருப்பு போல

மனைவியை விட அடக்கமாய் இருக்கிறாய் - நிலவு போல

பல உருமாற்றங்கள் பெற்று வாழ்ந்து கொண்டிருக்கிறாய் - நீர் போல

மெதுவாய் பொத்தானை அழுத்தினாலும் உயிர்த்து விடுகிறாய் - மந்திரவாதி போல

முகப்பில்லே நேரத்தையும் நாளையும் காட்டுகிறாய் - நாட்காட்டி போல

அவசரத்திற்கு கணக்கீடு செய்யவும் உதவுகிறாய் - வாய்ப்பாடு போல

எங்கிருந்தாலும் அந்த ஊரின் வெப்பநிலையையும் அறிய வைக்கிறாய் - தொலைக்காட்சி போல

ஆள் இல்லாத இடத்திற்கும் வரைபடம் காட்டுகிறாய் - அளவுகோல் போல

அங்கு சேர்ந்தடையும் நேரத்தையும் சொல்கிறாய் - கடிகாரம் போல

சில நேரங்களில் சீக்கிரமாகவும் செயல்படுகிறாய் - கணினி போல

சாமானியனிடமும் தஞ்சம் புகுகிறாய் - பழைய சோறு போல

தொலைவில் நான் இருந்தாலும் தொடர்பு படுத்துகிறாய் - அஞ்சல்காரர் போல

நான் உன்னை நிராகரித்தாலும் ஒட்டிக்கொள்கிறாய் - உறவு போல

தவறிய அழைப்பை ஏற்க நினைவுபடுத்துகிறாய் - நண்பனை போல

இது தான் உன் வெற்றியோ ?

இல்லை 

உன்னை உருவாக்கியவனின் வெற்றியோ ?

இல்லை 

உன்னை எங்களிடம் சேர்ப்பித்தவன் வெற்றியோ ?

இல்லை 

உன்னை இயக்க கற்றுக்கொண்ட மனிதனின் வெற்றியோ?

இல்லை 

காலத்தின் வெற்றியோ ?

இல்லை

காலனின் வெற்றியோ?

அறிய மனம் துடிக்கிறது. அதையும் நீயே சொல்லிவிடு, மேலும் ஐக்கியமாவேன் நான்

அதுவரை உன்னிடத்தில் என்னை கொடுத்தேன்,

கொடுக்கிறேன், 

கொடுப்பேன்

இப்படிக்கு அலைபேசி என்னும் உன்னை என்றும் மறவா மனம்